HNUB NQAUM NPLOOJ

HNUB NQAUM PAJ NQAUM NPLOOJ

( thiab rov ntseeg txog Yes Xus uas raug dai saum ntoo cuam ) === Zaj lus 1 tias :” Pis Las Tos muab Yes Xus rau cov tub rog nplawm tas - Ces nws tso Yes Xus rau lawv cia lawv muab Yes Xus dai sa um ntoo cuam “ .

Cov kwv tij, ib pab tub rog nplawm Yes Xus. Lawv xuas ib cov hlua uas muaj pob txha thiab muaj qe txhuas. Ua li thaum lawv nplawm Yes Xus zoo li ntawd, mas Yes Xus thiaj los ntshav ntau. TEEV NTUJ: Huab Tais Yes Xus, Koj raug raug txom nyem heev li ntawd thiab koj tuaj yeem tuag kuj yog vim tas ntiaj teb cov txhaum thiab yog vim tas cov neeg uas niaj hnub no ua neej nyob ntiaj teb .

Li ntawd lub caij puag thaud ,cov tub rog Los Mas lawv yog cov neeg sawv peb chaw los txo koj txoj sia

Huab Tais od, peb nco txog zaj lus ntawd ces peb ib txhij tu siab kawg nkaus .Peb thov koj zam peb tej txim txhaum . Huab Tais, thov koj pab peb kom xwv peb thiaj yuav ntxub tas puas tsav yam qhov txhaum huv tib si

Zaj lus 2 tias : Tus nom tswj teb chaws cov tub rog coj Yes Xus nrog lawv mus hauv lub tshav txiav txim Ces cov tub rog txhos caug ntawm Yes Xus xub ntiag . Lawv thuam Yes Xus tias :” Vaj Yus Das, peb hwm koj ! “ . Cov tub rog nto aub ncaug rau Yes Xus. Lawv muab rab pas tuaj ntaus Yes Xus taub hau – Ces lawv cab Yes Xus mus dai saum ntoo cuam “

Cov kwv tij, lub caij ntawd mas nyob saum Yes Xus taub hau, lawv sau ntawv piav txog Yes Xus lub txim tias : “Tus no yog cov His Xas Lais tus vaj “

Cov kwv tij, thaum Pis Las Tos sau lo lus ntawd, mas nws yeej thuam cov His Xas Lais tias lawv tau muab lawv tus vaj tua tuag.

TEEV NTUJ : Huab Tais Yes Xus, lub caij ntawd, koj muab koj tej kev hlub xyaw koj tej kev txom nyem ces koj muab koj txoj sia los txi Ntuj. Huab Tais Yes Xus, peb tus Vaj khuv leej neeg tas nrho, peb rov thov txim ntawm koj - Huab Tais peb yeej tu siab ntawm peb tej txhaum

Zaj lus 3 tias :“ Thaum cov tub rog Los Mas coj Yes Xus mus pem lub roob Nkos Nkos Tas mas cov tub rog nthos ib tug txiv neej hu ua Xis Moos tuaj Xis Les Nas teb tuaj . Lawv muab Yes Xus tus ntoo cuam rau Xis Moos pab nrog Yes Xus kwv tus Ntoo Cuam

TEEV NTUJ : Huab Tais Yes Xus , koj tau tshaj lo lus no tias : “ Leej twg xav los raws kuv , nws yuav niaj hnub kwv nws tus ntoo cuam, ces nws yuav lawv kuv qab “

Mas ,lub zim txwv no, nyob hauv peb zos, koj hu peb tsoom ntseeg nrog koj koom siab koom ntsws, ces peb yuav muab peb tej mob nkees thiab peb tej hauj lwm hnyav los txi Ntuj kuj zoo cuag li koj thiab nyob hauv koj thiab.

Huab Tais Yes Xus, thov koj pub ib feem ntawm koj tej kev nyiam kev hlub nqes los hauv peb lub siab ces koj txoj kev hlub thiaj yuav tau ua peb txoj sia

Zaj lus 4 tias: “ Hnub ntawd , yav hnub qaij 3 teev, mas Yes Xus hu ib suab nrov nrov hais tias :” Txiv, kuv tso kuv txoj sia rau hauv koj txhais tes “

TEEV NTUJ : Huab Tais Yes Xus, koj tau tso siab lug rau Leej Txiv nyob saum ntuj Leej Txiv yuav tsis tso koj pov tseg - Nws yuav txuag koj lub neej thiab koj txoj sia : ( 1 P Z 5:7

Hos qhov nplij peb siab kuj mus li no tias : txhua txhia hnub , koj hu peb nrog koj tso siab lug rau peb Txiv nyob saum ntuj xws li koj tias : “ Txiv ,kuv tso kuv txoj sia hauv koj txhais tes ……………………………………………………………………………. Cov kwv tij , hnub no mas tsim nyog peb yuav khaws peb zaj lus no tseg hauv peb nruab siab :

1 : Huab Tais Yes Xus yog peb tus Vaj khuv leej neeg tas nrho. Nws muab nws tej kev nyiam kev hlub los cawm peb dim ntawm qhov txhaum

2 Thaum peb ua Ntoo Cuam lub Cim mas peb haj yam yuav tu siab ntawm peb tej txhaum

3 : Peb teev hawm Tswv Ntuj mas peb yuav tso peb txoj sia hauv Tswv Ntuj txhais tes, kuj yog vim Huab Tais Yes Xus thiab nyob hauv Huab Tais

T.P. Txhiaj Foom omi April 2014